Judg 12 | ZomZIV | STEP | Ephraim mite in a galhatna uh khawmin Zaphon galkah uh a, Jephthah kiangah, “Bang hangin Ammon-te do-a na kuanin na dopih dingin ko hong zawn lo na hi hiam? Na inn tawh kong buhal khawm ding uh hi,” a ci uh hi.

Judges 12

Jephthah le Ephraim

1 Ephraim mite in a galhatna uh khawmin Zaphon galkah uh a, Jephthah kiangah, “Bang hangin Ammon-te do-a na kuanin na dopih dingin ko hong zawn lo na hi hiam? Na inn tawh kong buhal khawm ding uh hi,” a ci uh hi.

2 Jephthah in, “Kei le ka mite, Ammon-te tawh kidona lianpi ka neih laitakun kong sap hangin amau khut pan nong hon tuan kei uh hi. 3 Nong huh loh ding uh ka muh ciangin ka nuntakna mahmah kipia-in Ammon-te do dingin ka galkah a TOPA in amaute hong zosak hi. Bang dinga kei hong sim dingin tuni-a hong kuan na hi uh hiam?” a ci hi. ^a

4 Tua ciangin Jephthah in Gilead mite kaikhawmin Ephraim a do hi. Gilead-te in amaute a vattukgawp uh hi, bang hang hiam cih leh Ephraim-te in, “No Gilead-te, Ephraim-te le Manasseh-te pana minam, taisante na hi uh hi,” a cih ngei man uh ahi hi. 5 Gilead-te in Ephraim paina Jordan ngahmunte ngah in pang uh a, Ephraim a suaktasunte pai-in, “Kei hong galkahsak in,” a ci uh ciangin Gilead mite in, “Ephraim-te na hi hiam?” ci-in a dong uh hi. 6 Amah in, “Hi ke’ng,” ci-a a dawn leh, “Pha hi, ‘Shibboleth’ ci ou leh,” a ci uh hi. Amah in, “Sibboleth” a cih a, tua kammal mantaka a cih theih kei leh amah manin Jordan ngahmunte ah a that uh hi. Tua huna a thah uh Ephraim-te tul sawmli le nih a pha hi. ^b

7 Jephthah in Israel kum guk sung a makaih a hi. Tua ciangin Gilead-te Jephthah si-a, Gilead sunga khuapi khatah kivui hi.

Ibzan, Elon le Abdon

8 Ama khit ciangin Bethlehem a Ibzan in Israel a makaih hi. 9 Amah in tanu sawmthum le tapa sawmthum a nei hi. A tanute ama bawng’ a hilote tawh kitengsakin, a tapate’ zi dingin ama bawng’ a hilo panin nungak sawmthum a pi hi. Ibzan in Israel kum sagih sung a makaih hi. 10 Tua ciangin Ibzan si-a Bethlehem ah kivui hi. ^c

11 Ama khit ciangin Zebulun-te Elon in Israel kum sawm sung a makaih hi. 12 Tua ciangin Elon si-a, Zebulun gam Aijalon ah kivui hi. ^d

13 Ama khit ciangin Pirathon panin Hillel’ tapa Abdon in Israel a makaih hi. 14 Amah in laa sawm sagih tunga tuang tapa sawmli le tupa sawmthum a nei hi. Amah in Israel kum giat sung a makaih hi. 15 Tua ciangin Hillel’ tapa Abdon si-a, Amalek-te mualtung gam sung Ephraim a Pirathon ah kivui hi.